ŠKURIN: Barba Natale

MediaSfera

 

Piše: Ksenija Matović

Foto: Ksenija Matović

 

 

Vukao mreže,

teške  od murave i  barbuna.

 Pod noktima bibao grimizna mora.

Odložio vesla.

Topli bokuni japanskih jabuka,

tukli su narandžasto…

o  zemlju punu sutrašnje  kiše.

 

Novogodišnji vigvam

 

Vožd komunitade,  primus inter mančester  stella rossa,  stio je da za-Novu, grad bljesne istom, ako ne i sjajnijom  iluminacijom,  nakićenih svjetskih  metropola, poput Beograda i Sarajeva.

Titograd je ka i vazda bio in, pa su uoči Nove, osim spomenika Titu, postavili i must have  kite… sitne, ali dinamitne.

Jedino mi nismo bili ni za-kurac.

Vožd je zbog-toga pokaza roge centrali i na-trg postavio  jelku u tipu vigvama.

U nju se krila  šošonsko – čečenska  klapa,  koja je 31.decembra, tačno u ponoć trebala intrat na Sat kulu i zakantat  “Nam nužna odna pobeda i seven delegata”.

Ipak, nije moga nać  Đingl bols  ka u Beogard, pa je bio totalmente dešperan.

Stvar je ka i-vazda izvukla Plava zgrada, avangarda komunitadi.

Stanari su na zboru, jednoglasno usvojili zaključak da se dio podrumske laboratorije namijenjene uzgoju gandže, tabaka Diplomatikos na-falcu i subverzivnih ideja, opredijeli za susjeda Sandra, meštra od paštroća.

Brontuljo je i sparićavo do duboko u noć i onda pred zoru, kad je cijela komunitad, osim vožda i njegovih 18.362,99 zaposlena u-Opštinu, spila, na-provu puka vatromet.

Ma, ke kaco!!!!!!

Manjifiko.

 

Glavna autobuska stanica Gvantanamo

 

Na glavnu autobusku stanicu u tipu Gvantanama, u susret  prazničnima diverimentima, arivala je  rijeka turista iz Heiđina,  Sankt Peterburga i Jagodine.

Domestiko šerpasi smještaja na pjenu od Orjena, se od-ograde,  nisu mogli probit do pobratimskih naroda i narodnosti.

Komunalna ju je provala još  ljetos, ali   i-sad uklonit, ma je šinjora Đina iz Titograda pokazala srednji, dreknila  “No passaran “ i puštila lektriku.

Komunalni policijoti, oni što su ih u-Opštinu poslali da uče điu đicu u oti Šaolin, pali su na nju u kate i  na fete.

 

Don Huanove jaslice

 

Don Huan je, na-misu reka, da djeci ništa ne treba kupovat za Božić, jer to nije njihov, već rođendan Isukrsta.

Reka je i to,  da Isukrst inače, a osobito za rođendan,   prima sve valute, jer su svi ljudi za njega jednaki.

Načinio u tom povodu i jasle.

Onda je jasle ponio u-Opštinu, jer je znao, koliko je važno bit na njima.

 

Topli bokuni japanskih jabuka.

 

Bioskop ” Orjen” je dava “ Le notti di Cabiria”

Nismo stili izać vanka.

Još smo vjerovali.

 


 

Ksenija Matović

Pesnikinja i novinarka, četkicama od burina, lebića, levanta i maestrala….slika vinjete grada od vala. Duhovita, topla, bez želje da se neko uvredi, ali sa željom da budemo svi zajedno pomalo bolji. Dala joj je naziv “Škurin”, jer svi pomalo volimo da odškrinemo “škure” i pogledamo što se zbiva napolju, dok smo mi relativno sakriveni. Obećava dogodovštine sa pijace, parkinga, plaža i duhovite dijaloge.